Phili 3 | AOJFILIFITA | STEP | IpeꞋ alupipei, aeꞋ aꞋi iꞋi basef aeꞋami hiꞋilam naꞋama. IpeꞋ pendanifel ma Dembinai. AeꞋ ina okom nimanima endaꞋ basef amama atom doꞋok aliꞋ aꞋipipami, owaꞋ. Amama miliꞋakwepa ma waf aonai.

Philippians 3

Emi egafis sembaleꞋefa Kraisi, esis boꞋwes endilisi

1 IpeꞋ alupipei, aeꞋ aꞋi iꞋi basef aeꞋami hiꞋilam naꞋama. IpeꞋ pendanifel ma Dembinai. AeꞋ ina okom nimanima endaꞋ basef amama atom doꞋok aliꞋ aꞋipipami, owaꞋ. Amama miliꞋakwepa ma waf aonai.

2 IpeꞋ pindumafuma andeandeꞋ ma amam amama mandaꞋ waf aonai siꞋi nombagw aolupumi. Amam maꞋi miꞋipipa mehip momboma ukup ipeꞋimi petopaꞋ alop ipeꞋinai ma pila miꞋuli fowaꞋ God nasoꞋ Mosesanai. 3 God atona nandandepapa mape ananipai. Ambal BuꞋunai Ananinai atona deiꞋ mandaꞋ lotumana mafela agel Jisas Kraisi atona. ApeꞋ ina mombaleꞋefa waf satopaꞋ alopanai nagiambamapa, owaꞋ. 4 Enis epes Juda ukup maꞋi, “ApeꞋ Juda epes buꞋupai mandaꞋ waf apeꞋinai hianai andeandeꞋ naꞋama siꞋi matopaꞋ alop.” EaꞋ aeꞋ ikilaꞋasa waf anama. AeꞋ Judaiwei endilisi. 5 DeiꞋ main, nemaf anama ataꞋ saꞋowe ape nimeguf 8-peleim mafeꞋ eaꞋ amam matopaꞋ alop aeꞋanai. AeꞋ epen Israeliwei. AeꞋ wambota Benjamini. AeꞋ esimbel atom esis Hibrui. AeꞋ Farisi, epen aila miꞋuli Godi fowaꞋ nasoꞋ Mosesanai. AeꞋ aila miꞋuli anama andeandeꞋ ikilaꞋ epes hiesi. 6 AeꞋ okom nohafel laꞋifiwi endilisi ma andaꞋ opeh Godi. FowaꞋ andaꞋ opeha aha ^{▼▼FowaꞋ Pol ataꞋ owaꞋ notaga Kristen, anan naꞋi noha esis Kristen hiesi sogaꞋ. DeiꞋ main, esis ina saila miꞋuli fowaꞋ God nasoꞋ Mosesanai.} esis sios amam nematawa Kristen. IꞋi epes sowaloge ma waf aila miꞋuli anama, aeꞋ ofagema aꞋe. 7 EaꞋ aeꞋ okom napoma Krais atona aꞋi amamaga amama hiami aliꞋ andaꞋami, amama falafumi atom. 8 AeꞋ ina aꞋi amamaga amama atom, owaꞋ. AeꞋ okom napoma Jisas Krais atona Dembinai aeꞋanai ma amamaga hiami aliꞋ andaꞋami. Gawa anama endilisinai nikilaꞋ. EaꞋ ewaꞋ alafugama amamaga amama hiꞋalam aꞋi falafumi atom siꞋi alufuta. EmbaleꞋefa Krais atona ape laꞋifiwi ma Anan. AeꞋ andaiwaꞋma efaꞋ agel anama aman boꞋawe ma miꞋuli esis Juda sailanai, owaꞋ. AꞋi efaꞋ agel buꞋunai naꞋama. AeꞋ embaleꞋefa Krais deiꞋ God naꞋi aeꞋ aman buꞋuwei. 10 AeꞋ aꞋi egawa Krais endilisi noloma pepel God nafelona nohafel hiꞋagif. AeꞋ aꞋi elomana ondaoꞋoma ma waf anama ofaꞋ nimanimi ma ofaꞋ ukup etifim amama siꞋi Anan okom napoma nemaf anama nagaꞋanai. 11 AeꞋ aꞋi endaꞋam naꞋama ma anona nemaf God nefele wapotiꞋ hiꞋagif.

Pol fasoꞋmana nasagih mehip nafeꞋ nataga ikwaf

12 AeꞋ ina okom naꞋi efaꞋ waf anama Kraisi hiꞋalana ape boꞋawe andeandeꞋ, ataꞋ owaꞋ. DeiꞋ ape embaloꞋa waf anama laꞋifiwi. DeiꞋ main? Anan nofale nandandepe ma epe ananiwei siꞋiwi. 13 IpeꞋ alupipei, aeꞋ ina okom naꞋi endaꞋ waf anama eaꞋ, ataꞋ owaꞋ. EfaꞋ okom atotona naꞋama. Okom naseꞋe amamaga hiami fowaꞋimi maloma amamaga fowaꞋ matagamai eaꞋ deiꞋ andaꞋ opeh laꞋifiwi efaꞋ amamaga efaꞋam anona nemaf siꞋi epen nasagih mehipa nikilaꞋ nefaꞋam. 14 AeꞋ fasoꞋme asagih mehip etaga ikwafa efaꞋ agola waf buꞋunai. Amama naꞋama. Krais Jisas nandaꞋ opeh buꞋwami nagiambame ape laꞋifiwi aloma anan. DeiꞋ God nofale ma efeꞋ epe laꞋelaꞋef heven. 15 ApeꞋ hiapai mahapila ukup mataga siꞋi epes dambesi ma waf buꞋunai, apeꞋ ukup mefeꞋ etifima basef amama aliꞋ andaꞋami. Ama iꞋi ipeꞋ anom nomonas mopeipa, anona nemaf God nomboma ukup ipeꞋimi wapotiꞋ. 16 ApeꞋ mope naꞋama. Waf buꞋunai mefaꞋana eaꞋ, anama mombaloꞋana laꞋifipa.

17 Alupipei, ipeꞋ hipei pila waf aeꞋanai. EaꞋ pendandepas andeandeꞋ epes saila waf afaꞋinai ma pilana. 18 Nimeguf hiami aꞋipipa basef amama ma naumbih Kraisi. DeiꞋ naꞋama etin aꞋipipam wapotiꞋ aloma embif motah naep aeꞋami. Epes hiesi saila waf aonai eaꞋ sataga naumbih ma basef buꞋwami Krais nagaꞋ lawag usiꞋinai tuꞋwanainai. 19 Ukup asasimi mapoma alop asasinai atona, anama siꞋi god asasinai. Esis saꞋi esis etis agufisi sandanifela ma waf naninani aonai ambagof awomunai. EaꞋ ukup mapoma amamaga etapami atom. Epes isima anona nemaf higililas wambel aonai hel. 20 ApeꞋ mape amam nematawa ilifapai, wambel apeꞋinai heven. EaꞋ mape mohafa Dembinai Jisas Krais anona nemaf nokwaha heven nisilaꞋi nefaꞋapa motanimani. 21 Anona nemaf nomboma alop anama apeꞋinai notaga boꞋona nifififil endilisi siꞋi alop ananinai. Anan nondaꞋama pepel ananinai atona. Pepel anama anan nondaꞋ amamaga hiami mofeꞋ mope owina anan atona.